我的回收人（下）
上集：https://bit.ly/33szcPC
「我得到嘅嘢愈多，我就愈擔心你。我曾經安慰自己，可能你遁入空門，放低一切感情，所以我先得到咁多。」
秦二嘆氣：「但我收到消息，你搵緊令你開心嘅人……我冇辦法再呃自己，我知道你唔開心。」
我冷笑：「咁你嚟做咩，嚟恥笑我冷血無情，抵我唔開心？」
「我想將你冇咗嘅感情、思想……通通都畀番你。」秦二望住我。
我下意識問：「咁你會點？」
「咪變番一具行屍走肉。」秦二答得爽快。
我冷笑：「捨己為人？咁好心？」
秦二諗咗一陣：「當年你都成日諗點樣幫人㗎，蝕底都唔介意。不過四十年前，你好心扶個阿婆去醫院，反而畀阿婆敲詐，搞到你欠咗一大筆錢，跟住你就將『捨己為人』呢個特質畀咗我。」
我擺擺手：「既然你咁好心，我都冇理由拒絕，你就將『開心』呢個特質畀番我啦。」
秦二撓撓頭：「冇『開心』呢個特質，開心係好多樣嘢加埋嘅狀態。」
我有啲失望。
秦二又講：「但我活得咁開心，你有番我嘅嘢，你都會開心番㗎。」
有道理，我同意咗秦二嘅計劃，佢將所有嘢畀番我。
秦二念咗一句咒語，然後佢成個人呆咗，眼神空洞，變成一具行屍走肉。
嗰一刻，我覺得全身充滿力量、充滿熱情，我有番親情同愛情。
但我父母已經過咗身，我去咗拜祭佢哋，深深感受到「子欲養而親不在」嘅無奈。
我都去搵過我嘅前女友，我當年為咗娶老闆個女而飛咗佢，但其實我依然愛佢。
可惜，佢已經結咗婚，兒孫滿堂，佢見番我，都只當我係普通朋友。
嗰一刻，我心中只剩低痛苦同嫉妒。
我逼自己將注意力轉去其他嘢度，例如我依加有咁多錢，我好應該去幫人。
我叫秘書拎晒所有慈善計劃入嚟，好快就審批晒。
跟住落嚟嘅日子，我不斷捐錢，世上需要幫助嘅人真係太多啦，捐吓捐吓，我就捐晒成副身家。
我咁捨己為人，我應該開心啦。
但我嘅生活開始艱難，想買嘅嘢買唔到，不斷被其他人嘲笑……我一啲都唔開心。
秦二過得咁開心，因為佢生活喺回收人國度，所有人都唔用錢，唔需要物質。
我生活喺現實世界，冇錢，有感情，只會更唔開心。
唉，時間除咗改變世界，仲會改變自己。
呢幾十年嚟，我失去咗好多嘢，我以為我可以一次過攞番。
但原來，有啲嘢冇咗就係冇咗，無論點都返唔到轉頭。
你估，你嘅回收人，會係一個點嘅人？
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我的回收人
Search